Անորեքսիայի իրական պատճառը` մանրէային վարակը. news.am

Անորեքսիան ավելի շատ մահերի պատճառ է դառնում, քան ցանկացած այլ հոգեկան հիվանդություն, սակայն դրա զարգացման պատճառների մասին քիչ բան է հայտնի: Lancaster University-ի եւ University Hospitals of Morecambe Bay-ի հետազոտողները ենթադրում են, որ անորեքսիայի զարգացման պատճառներից մեկը կարող է լինել մանրէային վարակը:

Նրանց խոսքով, անորեքսիան չի կարող լինել զուտ հոգեկան վիճակ՝ այդ վիճակի իրական պատճառը կարող է լինել ինֆեկցիան: Նրանք նաեւ նշում են, որ մանրէները կարող են առաջացնել նաեւ այլ հիվանդություններ, օրինակ, գրգռված աղիների համախտանիշ կամ քրոնիկ հոգնածություն:

Գիտնականները պարզել են, որ մանրէային վարակ դեմ պայքարի համար օրգանիզմում գոյանում են աուտոհակամարմիններ, որոնք հետագայում հարձակվում են մարդու նյարդային բջիջների վրա, ինչն էլ հոգեկան հիվանդության պատճառ է դառնում: Այսինքն, նրանց կարծիքով անորեքսիան աուտոիմուն հիվանդություն է, որը դրսեւորվում է մանրէային վարակից հետո:

Հայտնի է, շեշտում են հեղինակները, որ կանայք տղամարդկանցից 10 անգամ հաճախ են հիվանդանում աուտոիմուն հիվանդություններով: Դա միայն հաստատում է գիտնականների հիպոթեզը. ե՛ւ անորեքսիան, ե՛ւ քրոնիկ հոգնածության համախտանիշը, ե՛ւ գրգռված աղիների համախտանիշն ավելի հաճախ կանանց մոտ են ախտորոշվում:

Չնայած հետազոտողներին դեռ չի հաջողվել պարզել, թե հատկապես որ միկրոօրգանիզմն է ունակ անորեքսիա առաջացնել:

Սա առաժմ զուտ ենթադրություն է, բայց եթե այն հաստատվի, անորեքսիան բուժելը կհեշտանա, շեշտել են գիտնականները: Մոտ ժամանակներս հեղինակները ծրագրում են իրենց հիպոթեզը ստուգել լաբորատոր կենդանիների վրա: Եթե նրանց հաջողվի հաստատել իրենց ենթադրությունը, ապա նրանք ծրագրում են զբաղվել անորեքսիայի դեմ պայքարի նոր միջոցի մշակումով:

Հարցեր, պատասխաններ, մեկնաբանություններ